بعد دفاعه عن محمد رمضان وانتقاده لأحد المسلسلات .. “الحاج الضوي” يتعرض لانتقادات واسعة على “فيس بوك”
كتب: أحمد القواسمي
نشر الحاج الضوي، عبر صفحته على موقع التواصل الاجتماعي “فيس بوك”، منشورا يدافع فيه عن الفنان محمد رمصان، وينتقد فيه أحد المسلسلات المذاعة في شهر رمضان.
وجاء نص المنشور كالتالي: “أنا عارف أن فيه ناس كتير هتشوف البوست ده وهتقول إني كاتبه علشان أطلع في دور أو كاتبه علشان بتمحك وكده .. أقسم بالله ما علشان كده خالص وأنا رفضت دور كان ممكن يخليني فوق بس لقيته غير لائق بى كصعيدي ولكن البوست ده لازم أكتبه .. أولا فيه مسلسل في رمضان كل حلقاته عن البلطجة ومحدش كتير انتقده تخيل لو محمد رمصان هو إللى كان عامل المسلسل ده كان الدنيا قامت وإعلام المحسوبية والمجاملات كان ولع الدنيا وكان كله قال حتى في رمضان بيعمل مسلسلات عن البلطجة أن مش بدافع عن محمد رمضان كشخص ولكن بتكلم عن مبدأ لأن محمد رمضان بدأ من الصفر ومن عيلة بسيطه زى حالتنا لا أبوه فنان ولا مخرج علشان كده ناس كتير بتحط عليه وفيه ناس كتير بتحبه وادأنا مليش علاقة بأى اختلاف في أي مواقف هو عملها قبل كده أنا بس بتكلم عن المسلسل إلى في رمضان لو هو إلى كان عامله كان إيه حصل من الإعلام الذي يكيل بمكيالين ومن الناس .. سؤال؟ وانا هسيب لحضراتكم الإجابة عليه وكمان عارف إن فيه ناس هتنتقدني أنا وممكن اتشتم عادى مفيش مشكله .. بس دي الحقيقة .. والحقيقة أحيانا بتزعل وأحلى حاجة في بوست ذى كده إنى بقدر أعرف الناس المنفسنة على وأعملهم حظر وحبايبى إلى عندهم ثقافة الاختلاف أديهم احلى لايك”.
وأثار هذا المنشور جدلا واسعا بين رواد موقع التواصل الاجتماعي “فيس بوك” الذين وجهوا تعليقات وانتقادات كثيرة للحاج الضوي.
ومن بين تلك التعليقات: “كلامك صحيح والله .. بس المفروض الموضوع ده يترفض تماما سواء من محمد رمضان أو أي ممثلين أخرين.. المفروض النقابة تمنع فورا أدوار البلطجة.. وهناك فرق بين دور الأكشن ودور البلطجة.. لكن كله بيرجع للنقابة هى اللى بتعدي وتخلي البلطجة تنتشر” .. “مسلسلات رمضان وغير رمضان ومحمد رمضان وغيره كلهم وجهان لعملة واحدة وهي هدم الأخلاق في المجتمع المصري ونجحوا في كده وخدوا عليه ملايين تحياتي لك يحج ضوي” .. “بالعكس لو بتقصد مسلسل ملوك الجدعنة كل الأغلبية رفضته لأن الجدعنة المصرية مش بلطجة وسنج وجنازير والممثل اللي انت ذكرته مريض بالنقص، عشان كده هو شخصية مرفوضة من ناس كتير، وليس للموضوع علاقة بأنه نشأ فقير” .
وقال أخر “أنا مختلف معاك تمام فى موضوع محمد رمضان انت ذكرت أن من بيت بسيط زى حالتنا وده شئ لا يعيبه ولكن هو نفسه من أساء لنفسه وأخيرا وليس آخرا نشره فيديو رميه الدولارات ماذا عنه اهذا فعل رجل يحس بالناس البسيطة التي هو منها والأهم أنه معظم أفلامه تروج للبلطجة وغيرها من السلوكيات التي تضر بالمجتمع وأما عن انتقاد الجميع له هذا لأنه فنان وفنان من العيار الثقيل ولكنه لا يشغله رساله العمل بل يشغله دخله المادي منه” .. “بص محمد رمضان موهوب جدا بس مشكلته الوحيدة إنه مركز على أدوار البلطجة ومش بينوع هو حصر نفسه في الحتة دى خلاص وبطبيعة البشر محدش بيفرق بين التمثيل والواقع والمفروض إنه ينوع في الأدوار أكتر من كده عشان كمان الناس ما تملش من التكرار في كل أعماله”.
