للمرة الثانية في أبوتشت.. انقلاب قطار محمل بالقصب بقرية النجمة يثير غضب رواد التواصل
كتب: أحمد القواسمي
شهدت قرية النجمة الغربية، التابعة لمركز أبوتشت بمحافظة قنا، اليوم الأحد، انقلاب قطار محمل بقصب السكر وسط الكتلة السكانية بالقرية، ما أدى إلى ترك السائق جرار القطار دون أدنى اهتمام بالأرواح.
أثارت هذه الواقعة غضب واستياء رواد موقع التواصل الاجتماعي “فيس بوك”، مبديين استيائهم من تصرف سائق قطار القصب، وذلك من خلال تعليقاتهم على تلك الواقعة، حيث قال محمود فتحي:”حسبي الله ونعم الوكيل.. اقسم بالله النظام ده بيحصل كل سنة في موسم القصب.. دي عربية قصب محملة في مركز أبوتشت قرية النجمة الغربية.. أنا دلوقتي عاوز اعرف فين المسئولين.. العربية اتقلبت والأسواق خد بعضه وطار وكل ميتقلب بيطير”.
وتابع: “فين أصحاب البدل والمسئولين يا جماعة حرام عليكم.. اقسم بالله احنا تعبنا كل سنة يموت شخص مننا.. السنة اللى فاتت نزلنا المرحوم الطفل يوسف ومحدش اتحرك.. نرجو من كلا من هيئة السكك الحديدية والنواب وأصحاب المكانة العالية.. ارحموا من في الأرض يرحمكم من في السماء.. نطالب بتغيير خط العربات وليس إصلاحها علشان مينفعش تتصلح وهتتقلب تاني”.
وعلقت صفاء عبدالناصر قائلة: “حسبي الله ونعم الوكيل في الإهمال ده.. البيت ده بيتنا.. اقسم بالله احنا عايشين في رعب.. احنا النوم ده مبنشفهوش.. وكل سنة حادث شكل.. داحنا لسه مفقناش من حادث ابن عمي ال اتقلبت عليه وتوفي في وقتها وغيره وغيره”.
وقال محمود البدري، في تعليق له: “السنة اللى فاتت انقلبت واحدة وتوفي طفل في نفس المكان تقريبًا”، وعلق محمد أحمد قائلاً: ” إهمال ومفيش حد بيتكلم”، وأضاف محمود جابر قائلًا: “لا حول ولا قوة إلا بالله العلي العظيم الحمد لله جات على خير ربنا يسترها على ولادنا ولجميع البلد”.
