“مدير وقائي أبوتشت” يوضح تحورات فيروس كورونا وأعراضه الجديدة
متابعة: أحمد القواسمي
قال الدكتور محمد هارون، مدير الطب الوقائي بالإدارة الصحية بأبوتشت، إن فيروس كورونا يتحور على الأقل مرتين كل شهر، مشيرا إلى أنه في دراسة انجليزية اثناء تحليل السلالة الجديدة في انجلترا اكتشفوا في الصيف الماضي أن التحور في الفيروس كان رقم ٢٣ منذ أول حالة مكتشفة في الصين، مؤكدا أن الفيروس الموجود حاليا متحور حوالي ٣٠ مرة عن أول فيروس في ووهان، موضحا أن التحورات طفيفة على سطح الفيروس لكن چيناته وخصائصه الداخلية مازالت نفسها، واللقاحات مازالت تقدر تتعامل مع الفيروس.
وتابع رغم أن تحورات الفيروس طفيفة وخارجية إلا أنها أدت إلى ظهور أعراض وتفاعلات جديدة للفيروس في الجسم، موضحا أن الأعراض الجديدة تشمل: ألام في العين، طنين وحرقان في الأذن، رائحة غريبة في الأنف، تكسير رهيب في الجسم، سيلان في الأنف، ومشاكل جلدية مثل الحكة والبقع الحمراء كأنه دور حساسية.
وأضاف “هارون” قائلا: “الحاجات دي ماكنتش موجودة في ٢٠٢٠ خالص، ده حتى العلامات الأساسية اتغيرت، يعني في الأول كنا نجزم أن الحالة دي كورونا عند وجود حمى وضيق في النفس، دلوقي ممكن ما تلاقي حمى ولا مشاكل تنفس.. بس تلاقي صداع غبي وعميق.. وتقل في الأكتاف مع فقدان حاسة الشم والتذوق أو الشم بس.. دي المؤشرات الجديدة”.
وأردف قائلا: “كورونا الصعيدي غير كورونا البلد، بجد الاثنين ماشيين رحلتين غير بعض تماما، اثناء انحسار الموجة الأولى في القاهرة كان في ذروة عندنا في الصعيد، ولما بيكون في ذروة في القاهرة بتلاقي مفيش كورونا عندنا في الصعيد، ودلوقتي إحنا في الموجة الثالثة عندنا ذروة في الصعيد ومابقيناش عارفين حتى دي ذروة الموجة الثالثة ولا الثانية أساسا”.
وأوضح أنه لن يمنع الإصابة إلا الكمامة والتباعد، واللقاح لن يمنع الاصابة إلا إنه ضروري جدا لتقليل الحِمل الفيروسي وشدة الأعراض للحفاظ على حياتك، مناشدا المواطنين قائلا: “احمي نفسك من شدة الإصابة قدر المستطاع، وخذ بالأسباب يا أخي عشان ربنا يحميك”.
واستطرد قائلا “المرة دي محدش هيقولك أقعد في بيتك بالعافية إذا كنت مش حابب تلتزم، المسئولية فردية.. لو مكانش عندك المبادرة لاتخاذ قرارات زي لبس الكمامة ومش هبالغ لو قلتلك البس كمامتين وتجنب الازدحام، ماحدش هايساعدك وأديك شايف حالات الوفاة حوالينا بقيت عاملة زي تساقط أوراق الشجر، دلوقتي الباب مفتوح واللي عايز ينزل ينزل واللي عايز يخالط يخالط بس لو اتصابت ما حدش يعرفك”.
وناشد مدير الطب الوقائي بأبوتشت المواطنين قائلا: “حافظ على نفسك ماتستناش حد يمنعك بالعافية، إحنا مش أطفال، إحنا المفروض نكون قدوة جيدة لأطفالنا، خطط جيدا كيف ستحافظ على نفسك و على أهلك ولا تهمل ذلك في الذروة الحالية”.
